წ.ბ – სასრული და უსასრულო თამაშები

თამაში, სულ მცირე, ორი სახის არსებობს. ერთს შეიძლება სასრული ეწოდოს, მეორეს – უსასრულო.
სასრულ თამაშს მოგების მიზნით თამაშობენ, უსასრულოს _ თამაშის გასაგრძელებლად.

სასრული თამაშები ჩვენი ყოველდღიურობის ნაწილია, უსასრულო თამაშები _ მისტიკურია. უსასრულო თამაშების მიზანი არა მოგება, არამედ იმის უზრუნველყოფაა, რომ თამაში მუდამ გაგრძელდეს. წესები, საზღვრები და მონაწილეებიც ნებისმიერ დროს შეიძლება შეიცვალოს _ თამაში კი არასდროს არ უნდა დასრულდეს.
რა არის უსასრულო თამაშები? როგორ ახდენს გავლენას ჩვენს სასრულ თამაშებზე? რას ვაკეთებთ, როცა ვთამაშობთ _ სასრულად თუ უსასრულოდ? და როგორ შეიძლება უსასრულო თამაშებმა გავლენა იქონიოს ჩვენს ცხოვრებაზე?
ჯეიმს ქარსი ამ შეკითხვებზე პასუხის გაცემას ცდილობს. იკვლევს და აღნიშნავს, რატომ და როგორ ვთამაშობთ სასრულად და უსასრულოდ. ის შეისწავლის ჩვენს სამყაროს _ სათამაშო მოედნის სასრული თამაშებიდან დაწყებული, კულტურასა და რელიგიაში ნაპოვნი უსასრულო თამაშებით დასრულებული. გზად ავტორი ყველაფრის შემეცნებას ცდილობს, გვიჩვენებს, რომ სასრული თამაშები სტატუსსა და სიმდიდრეს, ძალასა და სახელს გვიქადის, სამაგიეროდ უსასრულო თამაშები უფრო დახვეწილსა და დიდებულ რაღაცას გვთავაზობს.
ქარსმა გამჭრიახობითა და აფორიზმებით მდიდარი წიგნი დაწერა, რომელიც პირველი ნაბიჯია იმისკენ, რათა უსასრულო თამაშით ცხოვრების არსს ჩასწვდე.